Onte presentouse o volume, que trata de difundir entre un amplo abano de
lectores a riqueza dos xacementos
MARÉ
O Concello de Lugo
presentou onte un libro trilingüe, escritor por Antonio Rodríguez Colmenero,
que trata de difundir entre un amplo abano de lectores, a riqueza arqueolóxica
de Lugo. O libro recolle o espírito de A Muralla Romana de Lugo, Patrimonio
da Humanidade, un volume publicado no 2004 que recollía traballos históricos
e arqueolóxicos sobre os diversos aspectos do monumento e da cidade. A obra,
segundo o concello, tivo unha grande importancia no mundo científico, pero o
seu propio carácter limita a súa utilidade a un público composto
fundamentalmente de especialistas.
Para difundir mellor
eses contidos, "mantendo o rigor científico imprescindible", publícase
o novo volume que recolle, ademais, os últimos avances dos estudos sobre a
cidade e a súa muralla, por consecuencia das recentes escavacións e achados, así
como da teorización histórica.
Durante a presentación
onte do libro, nun acto ao que tamén asistiu o alcalde da cidade, Xosé Clemente
Orozco, o profesor Rodríguez Colmenero -considerado un dos maiores
especialistas galegos no mundo romano- destacou "a necesidade de que o público
entenda o que foi o Lugo romano dun xeito sinxelo, popular ao mesmo tempo que
científico, pedagóxico e se é posible, ameno".
AS CARACTERÍSTICAS
Amplo fondo fotográfico
O libro trilingüe -escrito en galego- ten unha tirada prevista de mil
exemplares en cada lingua. Aínda que a maqueta final non está determinada,
tratarase dunha edición de nobres características materiais, con non menos de
catrocentas páxinas en cuarto ou equivalente e con encadernación en pasta dura.
Será, por outra parte, unha obra con ampla ilustración, consistente en fotografías
artísticas e arqueolóxicas, debuxos, infografías e planos, na súa maioría
procedentes do Servizo Municipal de Arqueoloxía, que conta cun importante
fondo, e outros de nova elaboración.
Ningún comentario:
Publicar un comentario