16.01.2011 A
escritora Annabel Lyon recrea nesta súa nova novela as conversas que mantiveron
Aristóteles e mais o conquistador Alexandre Magno, polo que, a través das súas
páxinas podemos asistir ás ensinanzas que recibiu o emperador de Macedonia
durante a época na que o filósofo se converteu no seu titor por petición de
Filipo, pai dese gran monarca
M.S.
A escritora Annabel Lyon
recrea na súa nova novela, El maestro de Alejandro, as conversas que
mantiveron Aristóteles e mais o conquistador Alexandre Magno. A través das súas
páxinas podemos asistir ás ensinanzas que recibiu o emperador e rei de
Macedonia durante a época na que o filósofo se converteu no seu titor.
A narración comeza cando
Filipo de Macedonia, pai de Alexandre, lle pide ó seu amigo Aristóteles que se
fixese cargo da educación do seu fillo adolescente, coa finalidade de modelar o
intelecto do futuro conquistador e "neno da guerra", consonte o
denominou a autora na presentación deste seu libro.
A adicción de Lyon
por este personaxe vén dende vello; dedicou os seus estudos á Filosofía e a súa
gran paixón sempre foi Aristóteles. Agora, con esta obra, a súa intención é
lembrarnos quen era este filósofo e o que fixo, xa que considera que soamente
se coñece o seu nome, pero non se sabe de que era responsable e canto lle
debemos.
Por mor disto, escolleu
este período da súa vida, do que se escribiu moi pouco e que supuxo unha época
"moi turbulenta en Grecia". "O propio Aristóteles vive en
convulsión interna porque vive lonxe de onde quería estar", sinala a
escritora nunhas declaración recollidas por Europa Press. Nestes anos entra en
xogo a figura de Alexandre, clave neste período da vida do filósofo. Lyon di
que aínda que "os seus logros foron abraiantes", non era un personaxe
"glorioso, senón desgraciado". "É o que hoxe chamariamos un neno
da guerra, alguén que con dezaseis anos xa se atopaba no campo de
batalla", salienta a autora.
Durante a relación entre
Aristóteles e Alexandre Magno o pensador transmítelle valores como a divina
proporción ("debes buscar o punto medio entre os extremos, o punto de
equilibrio"), unha moderación que para o futuro conquistador soamente
significa "valorar a mediocridade".
Durante a primeira etapa
destas ensianzas, o filósofo consegue exercer certa influencia e admiración
sobre o que se converterá en rei de Macedonia. Con todo, a medida que pasan os
anos, Alexandre céntrase nas súas aspiracións como monarca. "Podes
aprender sen conquistar", di o filósofo, ao que Alexandre replica:
"Non, ti es o que pode".
Lyon
foi rigorosa e mantivo a precisión histórica. "A única licenza foi situar
a Aristóteles no campo de batalla", subliña. Ademais, sinala que a maior
dificultade deste libro foi "tratar de habitar na mente dun xenio".
Segundo indica, hai moitas teorías acerca de por que este gran filósofo aceptou
educar e ensinarlle todo o que sabía a Alexandre Magno. "A miña tese é que
gozou co reto de traballar con alguén como Alexandre Magno", salienta a
escritora, que, ademais, engade que "non traballou encerrado nun cuarto,
senón que lle gustou implicarse e observar o ascenso da estrela
macedonia".
Ningún comentario:
Publicar un comentario