Está acusado de crimes de guerra, crimes contra a Humanidade e xenocidio.
La Voz de Galicia 15/10/2009
O xuízo no Tribunal Penal Internacional para a antiga Iugoslavia (TPIY) por crimes de guerra contra o ex líder serbobosnio Radovan Karadzic comezará o próximo 26 de outubro.
Así o anunciou hoxe a corte, que fixou a nova data tendo en conta que a Fiscalía ten de prazo ata o 19 de outubro para presentar a nova versión reducida da acusación.
O xuízo contra Karadzic debía empezar o 21 de outubro, pero, en resposta a unha apelación do acusado, os maxistrados aceptaron concederlle unha semana adicional a partir da presentación da nova acusación, para que poida estudala en detalle.
Para simplificar o proceso, os xuíces solicitaron á Fiscalía que presente unha versión actualizada da acusación, que inclúa onde sexa necesario «notas ao pé de páxina para explicar os cambios que non son obvios e así asegurar que Karadzic entende os cargos e alegacións» que se lle atribúen.
Karadzic enfróntase a once cargos de crimes de guerra e lesa humanidade, entre eles xenocidio, presuntamente ocorridos durante a guerra de Bosnia (1992-1995).
O cargo de xenocidio refírese ao asasinato de case 8.000 musulmáns homes en Srebrenica en 1995, na que é considerada a maior matanza logo da Segunda Guerra Mundial (1939-45).
O acusado máis importante do TPIY optou por defenderse a si mesmo, como xa fixo o falecido Slobodan Milosevic, pero os maxistrados aceptaron que o seu asesor legal, Peter Robinson, estea presente na sala do Tribunal e poida contestar directamente ás cuestións legais expostas durante o xuízo.
Ningún comentario:
Publicar un comentario