"Teño que sacar o graduado. Tamén me gustaría que a miña nai aprendera
a ler", desexa unha nena de etnia xitana... Arquitectos Sen Fronteiras
presenta o audiovisual 'Pedra Papel' no que conta a experiencia de once cativos
no asentamento de Ponte Pasaxe. Completo vídeo de Tingalaranga para GC no
interior.
Por Xurxo Salgado | A Coruña | 13/12/2011
"Quero
unha casa quente con calefacción e unha habitación... Eu prefiro unha casiña
porque un piso é moi pechado. Gústame saír para fora e ver xente", conta
en galego unha das nenas de etnia xitana que participa no vídeo.
"Teño
que sacar o graduado. Tamén me gustaría que a miña nai aprendera a ler",
escribe outra. "Meu pai quere traballar pero está enfermo. Antes
traballaba de mariscador pero agora xa non pode. Doelle a espalda e as
pernas", asegura un terceiro. Son os protagonistas dun vídeo de
Arquitectos sen Fronteiras.
O documental
'Pedra papel' reúne a once cativos do asentamento xitano da Ponte
da Pasaxe (A Coruña) nun espazo alleo ao seu entorno. O proxecto consiste na
elaboración dunha “mini reportaxe”, onde o guión saíu de xeito natural e
comunitario, entre as conversas e xogos que se deseñaron para o desenvolvento
das xornadas.
"A
maxia da infancia, e as ilusións por mellorar a vida, sempre están
presentes nas conversas das nenas e nenos que viven no asentamento de chabolas
de Ponte Pasaxe. Moitos xamais viron nin visitaron unha vivenda diferente
a unha chabola, nin sequera se fan a idea de cómo sería unha mellora na súa
vida que os igualara en dereitos e condicións ao resto de nenos e nenas da
cidade", apuntan desde esta ONG.
"Produto destes encontros logrouse
coñecer as motivacións, os soños, as inquedanzas e as manifestacións que os máis
pequenos de A pasaxe teñen ante a vida", engaden. Estas historias de vida
foron gravadas en audio e video, xerando así o recurso que dou pe á elaboración
do guión do Audiovisual “Pedra papel”.
O texto que se narra foi extraído dos
parlamentos que se xeraron entre os nenos e nenas nas actividades, intentando
conservar ao máximo posible as súas exposicións e que foi froito das dinámicas
de convivencia e traballo comunitario entre o equipo de Arquitectos Sen
Fronteias e os nenos e nenas de A pasaxe. "Con esta carta espero que
agora xa nos coñezas", remata unha das nenas que participa no documenta.
A
sedentarización do pobo xitano
Entre os anos 50 e 60 as familias xitanas
que percorrían os camiños en carros e cabalerías deixaron de viaxar e sedentarizáronse,
obedecendo ás transformacións producidas na estrutura social e económica da
sociedade española. Esta sedentarización deuse na meirande parte nas zonas
urbanas na busca de alternativas económicas e laborais.
Os asentamentos
supuxeron a posta en marcha de algúns mecanismos, escasos, de cara á integración
social, como puido ser a escolarización, pero tamén un debilitamento do
colectivo e da súa cultura, isto provocou un desaxuste que aínda hoxe está sen
resolver en moitos casos.
Nos anos 60 , no caso de A Coruña, comezaron a
implantarse algunhas medidas municipais de realoxo en zonas periféricas que
deron nacemento a asentamentos de infravivendas que aínda perduran hoxe, como é
o caso do Campanario en O Portiño. outras familias quedaron ao marxe
deste planes e seguiron nos asentamentos de chabolas. Posteriormente, nos anos
80, co motivo da construción dunha grande superficie comercial,
desmantelouse o asentamento de chabolas que existía na zona de A Cubela,
orixinando a creación de 3 novos asentamentos de chabolas.
Estes tres novos
asentamentos son Penamoa, froito da intervención municipal de construción de
barracóns provisionais, para aloxar ás familias de A Cubela; As Rañas, froito
dunha iniciativa particular dunha familia xitana e mostra do seu desexo de
normalización coa compra duns terreos no núcleo de Martinete-As Rañas; e A
Pasaxe, onde se aloxaron xitanos convivindo con mercheros e portugueses nas
naves abandonadas da “Conserveira Celta” e de “Jabones la Toja”. Todos estes
casos perduran dende os anos 80 ata día de hoxe, apartados da sociedade e
envoltos nun alto grao de vulnerabilidade e exclusión social.
Ningún comentario:
Publicar un comentario