venres, 28 de marzo de 2014

De cando a Casares Quiroga lle incautaron os bens


Atopan un expediente sobre a incautación de bens durante a Guerra Civil ao ex presidente do Consello de Ministros republicano. En marzo de 1940 foi declarado incurso en "responsabilidade política" e condenado a 15 anos de "inhabilitación absoluta" e se lle retirou a nacionalidade.
Por Galicia Confidencial | Compostela | 15/03/2014 Galicia Confidencial

Santiago Casares Quiroga, o último presidente do Consello de Ministros antes da Guerra Civil, volve á actualidade 78 anos despois do incicio desta contenda. E é que, nos traballos de organización dos arquivos dos xulgados galegos acaba de saír á luz un expediente iniciado durante a Guerra Civil, en 1938, para incautar os bens do ex máximo mandatario republicano.
O expediente a Casares Quiroga atopouse no arquivo común dos xulgados da Coruña e correspondía ao xulgado de Primeira Instancia número 2. Agora será trasladado ao Arquivo do Reino de Galicia.
Segundo indica a Xunta nun comunicado, en 1938 a Comisión Provincial de Incautacións de Bens da Coruña acordou instruír un expediente sobre Declaración de Responsabilidade Civil contra Santiago Casares Quiroga "tras as indagacións realizadas sobre a súa conduta, ideoloxía, traxectoria política, actuacións levadas a cabo e participación en revoltas".
As acusacións contra Casares Quiroga
Por sentenza do 7 de marzo de 1940 é declarado incurso en "responsabilidade política" polo Tribunal Rexional de Responsabilidades Políticas, que lle impón unha sanción de "quince anos de inhabilitación absoluta, outro quince de extrañamiento (expulsión) e o embargo total dos seus bens". E propón, ademais, ao Goberno -xa na ditadura- a perda de nacionalidade de Casares Quiroga quen, por outra banda, xa estaba exiliado en Francia.
O expediente atopado sinala que houbo indagacións para determinar as súas pertenzas e realizáronse inventarios da biblioteca e bens mobles e inmobles, que foron acompañados dos títulos de propiedade, incluídas escrituras do século XIX.
Esta descuberta foi posible grazas aos traballos que está a realizar a Xunta de inventario dos fondos documentais nos xulgados para determinar cales son dignos de ser conservados polo seu interese histórico e cales se poden eliminar.
En Galicia hai 50 arquivos xudiciais, nos que a Xunta calcula que hai un tres millóns de expedientes, con máis de 150 millóns de folios e cos traballos de expurgo preténdese gañar un 75 por cento de espazo.

Ningún comentario:

Publicar un comentario