El Diario | @eldiarioes © Amnesty International
Foi a activista saudita Manal Alsharif, que desafiou
en 2011 a prohibición que lles impide ás mulleres conducir, quen alertou de que
nos últimos días cidadáns sauditas recibiran mensaxes nos seus teléfonos
móbiles cada vez que as súas esposas cruzaban a fronteira. A noticia estendeuse enseguida polas redes sociais,
acompañada de denuncias de xente dentro e fóra do país. Tecnoloxía para
controlar as mulleres, titulaban medios e activistas de todo o mundo. Pero que
supón realmente este novo sistema electrónico?
Arabia Saudita é o único país do mundo onde as
mulleres teñen prohibido conducir, un feito que recibe cada vez máis oposición
dentro e fóra do país. É só unha máis das múltiples trabas que sofre a
poboación feminina nun estado que lles nega a maioría de dereitos. O
concepto de custodia masculina que establece o Dereito de Familia erixe os
homes nos seus gardiáns e limita os seus dereitos no referente ao matrimonio, o
divorcio, a custodia dos fillos, a sucesión, a propiedade, a elección do lugar
de residencia, a educación e o emprego. Tamén no relativo aos seus movementos.
Para isto último, o Ministerio de Interior saudita conta con tecnoloxía
punteira que fai que resulte máis sinxelo que os gardiáns poidan controlar as
mulleres ao seu cargo.
Non só as mulleres. O servizo do que dispón o
Ministerio de Interior desde 2010 permite os homes rexistrarse para recibir
actualizacións sobre todas as persoas ao seu cargo, que figuran incluídas no
seu documento nacional de identidade: fillos e fillas menores de 21 anos e
esposas. Desde novembro deste ano o servizo inclúe un dispositivo
electrónico que detecta desprazamentos ao exterior do país e que afecta de
forma especial ás novas estudantes que se trasladan a diario a universidades de
países veciños como Bahréin. Cada vez que unha destas mulleres, ou calquera
mozo menor de 21 anos, cruza a fronteira envíase un sms automático das autoridades
de inmigración ao seu titor ou gardián.
A doutora saudita Badria Albashir publicou o 19 de
novembro no diario Alhayat un artigo no que se mostraba especialmente crítica
do efecto que esta medida ten nas mulleres: Ti descansa, que xa controlamos
a túa muller por ti. As redes sociais enchéronse de comentarios respecto
diso, moitos deles en ton de burla. “Se necesito un sms para decatarme de que a
miña muller marcha do país, ou estou casado coa muller equivocada ou necesito
un psiquiatra”, chanceaba un usuario en Twitter.
“Este tipo de
medidas lembran os cintos de castidade que datan de hai 300 anos”, explícalle a
activista saudita Manal Alsharif a Eldiario. “Cada vez estamos máis asfixiadas
e con menos marxe de movemento”. Non é a única
que establece o paralelismo entre o sistema electrónico de control dos
movementos das mulleres co cinto de castidade.
Segundo o xornalista saudita Ahmed AlOmran, o
problema non é o servizo electrónico de envío automático de mensaxes, que en
realidade lles aforra ás mulleres e menores que queiran viaxar trámites
molestos que requirían até agora dunha autorización previa do seu gardián. “O
problema é que o Goberno está a reforzar leis que impoñen a tutela dos homes,
na que moito de nós non cremos. O Ministerio de Interior debería ofrecer unha
casa na que marcar. As miñas parentes femininas non necesitan o meu permiso
para viaxar, pero por desgraza ese día aínda non chegou”.
Supoña ou non esta medida un
aumento do control sobre as mulleres, o certo é que contribuíu a avivar un
debate que ás autoridades sauditas lles resulta cada vez máis difícil eludir. Atrapada
entre a presión nacional e internacional e os sectores máis conservadores do
país, a monarquía saudita combina tímidos pasos que apuntan a unha apertura en
cuestión de igualdade co reforzo da tutela masculina que establece o Dereito de
Familia. O aumento da presión sobre este reino que anula o 50 por cento da
súa poboación condicionará en gran medida que cristalicen os avances que as
sauditas levan anos demandando.
Ningún comentario:
Publicar un comentario