O Concello de Vigo farase co Arquivo Ksado por 30.000 euros

Adquirirá o milleiro de placas fotográficas que sobreviviu as represalias franquistas contra o autor e ao expolio

Xornal.com 31/12/2009

O concelleiro de Cultura de Vigo, Xesús López, anunciou onte que o seu departamento adquirirá preto dun milleiro de placas fotográficas e varios obxectos pertencentes a Luis Ksado, logo de chegar a un acordo coa familia do fotógrafo galego, que se fará efectivo a comezos de 2010. O edil nacionalista asegurou que a compra efectuarase por un total de 30.000 euros, e destacou que unha parte importante do arquivo de Ksado desapareceu cando o artista foi represaliado durante a Guerra Civil, por iso “cobra máis valor aínda que o que se conserva estea a disposición do público”.

Estes novos fondos sumaranse ao Arquivo Pacheco e ao resto de coleccións fotográficas de titularidade municipal e, a partir de 2011, exporanse no futuro Centro Galego de Fotografía, un museo que se situará no Casco Vello de Vigo.

Pola súa banda, o director do Arquivo Pacheco, Vítor Vaqueiro, explicou que só existen aproximadamente un milleiro de placas fotográficas de Ksado, fondos que cualificou de “tesouro”; porque “houbo quen se apropiou do arquivo facéndoo pasar como propio”.

Agora, a conta pendente do Centro Galego de Fotografía é o arquivo Llanos, que se atopa en Ribadavia. Xesús López lembrou que mantivo conversas coa familia do artista para manter os fondos en Vigo, pero non obtivo unha resposta clara. Os xornalistas preguntáronlle polas últimas declaracións do grupo municipal do PP, que asegurou estar mantendo unha negociación pola súa conta para recuperar o Arquivo Llanos, Xesús López dixo non ter comunicación oficial, pero considerou “positivo” que a oposición traballe coa Xunta e así “sume esforzos para que o arquivo estea onde ten que estar”.

López e Vaqueiro presentaron onte a Axenda de 2010 con fotos do Arquivo Pacheco, e que se centra en fotografías destes fondos datadas dos “anos escuros” da ditadura franquista. Estas imaxes reuniranse posteriormente para formar unha exposición, ao igual que se fixo coas instantáneas femininas da edición da axenda de 2009. Os volumes poderán adquirirse, a un prezo de 14 euros, nos catro museos municipais da cidade,a Casa dás Artes, o Quiñones de León, o Marco e o Verbum.

PARTE DA MEMORIA

Xesús López dixo que a fotografía é parte da historia e por iso cobra importancia conservar os arquivos fotográficos que recollen o pasado da cidade. Dixo que con ese obxectivo hai dous anos comezaron unha serie de iniciativas para que o Arquivo Pacheco fora patrimonio de toda a cidade. Abriuse ao público, púxose en marcha o proxecto Indagacións para documentar os fondos, editouse o libro Marcas de luz, montouse a exposición Mulleres, iniciouse o proxecto O espello da memoria e fíxose no 2009 a primeira axenda con fondos do arquivo.

Este proxecto culminará coa apertura do Centro Galego de Fotografía, que está prevista para 2011, e que ten a intención de converterse nunha referencia no Estado. O proxecto está orzamentado en dous millóns de euros e conta co respaldo económico do Goberno central, que se comprometeu a correr coa metade do seu custo. Estará situado nos edificios 17, 19 e 21 da rúa Chao, que suman no seu conxunto 900 metros cadrados, e que acollerán obradoiros e unha área de restauración, ademais das exposicións para o público. Unha parte do espazo estará reservada aos fondos da futura pinacoteca municipal.