Entre 14 e 25 millóns de
persoas están a vivir unha situación laboral de extrema precariedade
EFE . BARCELONA
Entre 14 e 25 millóns de
persoas traballan actualmente en réxime de escravitude, unha cifra superior á
dos escravos que foron raptados o século XIX en África para ser trasladados a
América, segundo se destacou onte na presentación do libro "Emprego,
traballo e desigualdades en saúde: unha visión global". Esta publicación,
que parte dun informe realizado en 2007 pola Comisión de Determinantes Sociais
da Saúde da OMS, e do que son autores Joan Benach e Carles Muntaner, mostra
como as condicións de emprego afectan as desigualdades de saúde dos
traballadores de todo o mundo.
Benach, profesor da
Universidade Politécnica de Cataluña, explicou que "entre 14 e 25 millóns
de persoas traballan en réxime de escravitude, un fenómeno invisible que se dá
en ámbitos tan dispares como redes de prostitución europeas ou empresas de
materias primas". Citou como exemplo desta situación a recolección do
cacao para grandes multinacionais en países como Costa do Marfil, onde
traballan máis de 100.000 nenos sen ningún dereito, ou cosendo pelotas de fútbol
para grandes marcas e acontecementos deportivos.
Segundo estes expertos, as
persoas estamos afeitas pensar na saúde en termos biolóxicos e en función do
estilo de vida, pero existen certos factores sociais como a calidade da
vivenda, o nivel económico, a globalización e as condicións de emprego e
traballo inciden directamente na saúde. Neste sentido, remarcou que as
desigualdades de saúde derivadas do emprego están estreitamente vinculadas a
outras desigualdades sociais, entre elas as diferenzas de riqueza, de participación
política e de educación.
Para Benach, o desemprego,
que afecta a uns 212 millóns de persoas, e a precariedade laboral, que padecen
uns 1.400 millóns de persoas no mundo, que son os denominados traballadores
pobres, aumentan a posibilidade de padecer enfermidades crónicas como
alcoholismo, tabaquismo, depresión, trastornos de ansiedade e de morrer
prematuramente. Sobre a orixe desta situación, tanto Benach como Carles
Muntaner, catedrático da Escola de Saúde Pública da Universidade de Toronto (Canadá),
consideran que está na falta de políticas sociais e na forma que teñen os
gobernos de relacionarse coas grandes empresas. Muntaner defendeu ademais que
"a precariedade laboral é tamén o medo a exercer os dereitos do
traballador, non gozar de autonomía, ter salarios baixos ou padecer exclusión
de beneficios sociais como vacacións ou asistencia sanitaria"
DATO
Inmigrante nova, altísimo
risco
O
estudo sinala que en España, un home de clase alta e de 30 anos ten un 20% de
posibilidades de ter un situación laboral precaria, mentres que no caso dunha
muller inmigrante e nova o risco elévase ó 90%.
Ningún comentario:
Publicar un comentario