A memoria da xente

Unha mostra recupera imaxes de Santiago de entre 1900 e 1975, testemuñas da evolución social, urbanística, antropolóxica e histórica da cidade

REDACCIÓN . SANTIAGO

Co tempo, as fotografías do cotián tórnanse documentos de valor histórico e antropolóxico. Pegadas das historias de vida dos cidadáns, protagonistas dos oficios, o lecer ou o cambio social. A rede de Centros Socioculturais de Santiago quixo recuperar a memoria das xentes da cidade que gardaron, precisamente, as imaxes. E fíxoo a través dunha exposición que acaba de abrirse no Centro Sociocultural do Castiñeiriño. A proposta pretende "continuar e potenciar as diferentes iniciativas relacionadas coa memoria viva da cidade", como foron xa "as mostras A historia vai por barrios, ou as publicacións promovidas polo movemento veciñal do Castiñeiriño, Conxo, A Sabugueira ou Marrozos", explicou a concelleira de Cultura e Centros Socioculturais, Socorro García Conde, durante a presentación aos medios da exposición.

A memoria da xente pretende, segundo explica a concellaría nunha nota de prensa, continuar a promover esta liña de traballo mediante a organización dunha exposición, gráfica e audiovisual, itinerante que aborda ao conxunto da cidade desde 1900 até 1975. Os obxectivos da exposición son a posta en valor das "caras" compostelás, incorporar á memoria colectiva todas as vidas de Santiago, converter en protagonistas estas pequenas historias anónimas e por último funcionar como base dun futuro traballo sociocultural que se desenvolva desde os propios Centros para enriquecerse con máis achegas, comentarios, lembranzas, documentos, imaxes, actividades...

O conxunto da mostra está de­señada para que poida circular polos Centros Socioculturais de cabeceira da rede. Ademais do Castiñeiriño tamén estará no do Ensanche, no de Vite, no de Conxo e no das Fontiñas e mesmo algún dos seus módulos poderá itinerar polo resto de Centros e Locais Socioculturais. Os contidos desenvólvense en soportes gráficos e audiovisuais.

Entre os elementos da mostra destaca un panel informativo sobre a transformación urbana con liña do tempo e punto de escoita e visionado de audiovisual. Acompañado de oito paneis impresos por ambas caras dedicados aos seguintes bloques temáticos: Así mudou Compostela, Vida e morte, Alimentación, Formación persoal, O traballo, Convivencia social, Habitar o territorio e O lecer e as festas.

Outros elementos destacados son as tres siluetas que baixo o epígrafe As mans do traballo están dedicadas ás leiteiras, aos minuteiros, e aos zoqueiros. Xunto a elas dous puntos de escoita e visionado dos audiovisuais nos que a veciñanza de Compostela,dá a súa "fe da vida" na cidade. E máis catro cubos representando As caras de Compostela.

Do labor asociado á Memoria da Xente xurdiu xa ademais Compostela no NO-DO, unha recompilación e dixitalización de imaxes.

AS CLAVES

O obxectivo é a posta en valor das "caras" compostelás e converter en protagonistas as pequenas historias anónimas e funcionar como base dun futuro traballo no ámbito sociocultural

A mostra vai acompañada de audiovisuais nos que os veciños e veciñas toman a voz, debullando os seus recordos e a súa interpretación da transformación da cidade na que viven