Arrincadas coas uñas

Non enterran cadavres, enterran semente (Castelao)

Dous anacos de cortiza do piñeiro contra o que foi fusilado Alexandre Bóveda exhíbense desde onte en Pontevedra na mostra ‘Da vida e o compromiso’, percorrido a través da peripecia vital e política dun dos intelectuais clave da historia galega no século XX. Bóveda tamén será hoxe homenaxeado na cidade por Causa Galiza.

REDACCIÓN

Dous anacos de cortiza do piñeiro contra o que foi fusilado na ma­drugada do 17 de agosto de 1936 na Caeira Alexandre Bóveda son algúns dos obxectos que se mostran na exposición que co tí­tulo Da vida e o compromiso se inaugurou onte no pazo da Cultura de Pontevedra sobre este dirixente clave no Partido Galeguista."Foron arrincados coas uñas por Cintia Rei" nai de Víctor Casas, que pasaba tempadas no domicilio da viúva de Bó­veda, Amalia, que a acom­pañaba nese momento de hai 60 ou 61 anos. De feito, Xosé Luis Bóveda, fillo de Alexandre e Amalia, dixo que hai unha foto na que se ve a Cintia á beira do pi­ñeiro e que foi tomada pola súa nai nese momento.

As dúas cortizas outrora grandes están envoltas "nun pano dos mocos que nunca máis foi usado nin lavado" e se agora aparecen máis reducidas de tamaño é porque algunhas persoas foron quedando con anacos minúsculos co paso dos anos.

A exposición, coa que arrincarán tamén en 2011 "os 75 anos do mag­nicidio" pretende que " a figura de Bóveda non que­de esquecida nunca xamais", expuxo o seu fillo. A mostra está organizada pola Cá­tedra Bóveda.

Hoxe, Pontevedra acollerá tamén unha homenaxe a Bóveda, organizada por Causa Galiza. O acto contará coa intervención do seu fillo, que falará do progreso da loita nacionalista desde a lembranza daquel abortado Estatuto de Autonomía para Galicia na segunda República.