7 billóns en violencia

Unha redución das agresións dun 25 por cento liberaría o suficiente diñeiro para cubrir a débeda grega ou para alcanzar os Obxectivos do Milenio

E.P. . MADRID

O aumento da violencia está privando de activos as economías dos países cando estas máis os necesitan, segundo o estudo realizado polo Instituto para a Economía e a Paz (IEP) e Economistas para a Paz e a Seguridade que afirma que a violencia leva máis de sete billóns de dólares anuais da economía mundial. Así mesmo, subliña que unha redución dun 25 por cento da violencia mundial produciría a liberación de preto de 1,8 billóns de dólares anuais, cantidade suficiente para cubrir a débeda de Grecia, financiar a consecución dos Obxectivos de Desenvolvemento do Milenio (ODM) e cumprir os obxectivos climáticos e enerxéticos da UE 20-20-20 (20 por cento de redución de emisións, 20 por cento de mellora da eficiencia enerxética e 20 por cento de enerxías renovables en 2020).

Este informe, o Índice de Paz Global, sinala que o mundo foi ó longo de 2009 menos pacífico por segundo ano consecutivo. Nun momento no que a economía mundial segue inestable, os datos deste ano reflicten a intensificación dos conflitos e a crecente inestabilidade, que se uniron á recesión que comezou a finais de 2008.

O informe estuda 149 estados independentes. O documento componse de 23 indicadores cualitativos e cuantitativos, os cales combinan factores internos e externos, que oscilan desde gastos militares a relacións con países veciños e niveis de crimes violentos.

"A investigación desenvolvida polo instituto baseouse nos datos recollidos durante catro anos e ofrece unha demostración cuantificable do efecto positivo que tería a mellora da paz e como se podería transformar a economía mundial, desenvolvendo a riqueza necesaria para abordar a débeda, financiar a expansión económica e crear unha contorna máis sostible", afirmou o fundador deste índice global, Steve Killelea.

Nova Zelandia encabeza a clasificación por segundo ano consecutivo e foi un dos tres únicos países dentro dos dez primeiros clasificados en mellorar a paz no índice 2010. Islandia pasou ó posto número dous despois de que a súa economía nacional se estabilizase e tras caer ó posto número catro o ano pasado, demostrando así a solidez das nacións pacíficas.

"Os recursos utilizados en guerras, encarceracións, sistemas de armamento e comercio de armas, entre outros, poderían destinarse a iniciativas para erradicar a pobreza, promover a educación e protexer o medioambiente", afirmou o profesor Jeff Sachs. "O GPI non só tratará de captar a atención sobre estes problemas cruciais, senón que nos axudará a entendelos e a investir produtivamente nun mundo máis pacífico", aseverou.

Oriente Medio mellorou desde 2007

A pesar da situación mundial, Oriente Próximo e a rexión do norte de África e de África Subsahariana experimentaron unha melloría desde que comezou a investigación en 2007. Os indicadores inclúen maior estabilidade política, unha caída no gasto militar en Oriente Próximo e no norte de África e un menor acceso ás armas, ademais dun descenso dos conflitos e mellores relacións entre os países veciños de África Subsahariana.

Pola contra, o sur de Asia presentou o maior descenso no seu nivel de pacificación como resultado dunha maior participación nos conflitos, un aumento das mortes por loitas internas e por maiores abusos cometidos contra os Dereitos Humanos. Os principais países que sufriron un descenso no seu nivel de paz son India, Sri Lanka e Paquistán.

Pola súa banda, Latinoamérica tivo a maior caída na paz anual por causa do aumento da violencia interna, dos homicidios e dun aumento nos niveis da criminalidade percibida.

"Esta investigación indica claramente a relación positiva entre a paz e os factores crave das operacións empresariais de éxito, como o tamaño do mercado, as estruturas dos custos ou os beneficios", explicou o director executivo do Pacto Mundial da ONU, Georg Kell. "Os líderes empresariais deberían ter en conta esta investigación para o desenvolvemento dos seus plans estratéxicos e operativos, así como para a toma de decisións sobre os seus investimentos", engadiu.

O Instituto para a Economía e a Paz é un fondo internacional dedicado á investigación e á educación sobre a relación que existe entre a economía, os negocios e a paz. Un panel internacional de expertos no estudo da paz coordina o proceso de identificación e ponderación de indicadores no GPI, compilados pola Economist Intelligence Unit.

Europa Occidental no primeiro posto

Europa Occidental continúa sendo a rexión máis pacífica. A maioría dos seus países clasifícanse dentro dos 20 primeiros, e as cinco nacións escandinavas clasificáronse dentro dos dez primeiros postos.

Iraq e Somalia, os máis violentos

Os países menos pacíficos, e por segundo ano consecutivo, foron Iraq, Somalia e Afganistán. Pola súa banda, Siria, Xeorxia, Filipinas, Rusia e Chipre sufriron as maiores caídas no índice de paz global deste ano.

Estados Unidos presenta mellora

Estados Unidos presentou en 2010 a maior mellora no índice de paz dos catro anos nos que se desenvolveu, debido ó descenso de inestabilidade política e do número de mortes por conflitos externos.