Tras meses de caída, remontan un 1,8% ·· En total, uns tres millóns de estranxeiros residentes no Estado envían cada ano algo máis de 7.000 millóns de euros aos países de orixe, que reciben directamente entre sete e oito millóns de persoas, tres millóns de nenos

1

REDACCIÓN . SANTIAGO

Os envíos de euros aos países de orixe aumentaron un 1,8%
FOTO: AXENCIAS

Os inmigrantes viven en España "ao límite da subsistencia" con tal de poder seguir enviando diñeiro á familia que deixaron no país de orixe, un "sacrificio" para adaptarse á crise económica e afrontar unha taxa de paro do 28% que, segundo os expertos, explica por que tras seis trimestres consecutivos de caída, 2009 pechou cun aumento do 1,8 por cento no volume de remesas que saíron do país.

Así o sinalou o director do Centro de Investigación Sobre Globalización Remesas.org, Iñigo Morei, tras a inauguración en Madrid dunha xornada sobre os envíos de diñeiro que contou coa participación da secretaria de Estado de Inmigración e Emigración, Anna Terrón; o director da Organización Internacional das Migracións en España (OIM), Manuel Pombo; o presidente da Asociación Nacional de Empresas de Envío de Diñeiro, Gonzalo Valente e o director xeral de Santander Envíos (Grupo Santander), Fernando Alonso.

Segundo a secretaria de Estado, pódese "dicir que hai brotes verdes" nas remesas, que o Goberno atribúe "á capacidade dos inmigrantes, á súa maior conciencia da responsabilidade que teñen ante si unha situación difícil e ó cambio de patróns de aforro", xa que teñen "unha gran capacidade de sacrificio e de adaptación". Para Morei, a clave está en que os inmigrantes comezaron a enviar maiores porcentaxes dos seus ingresos á familia, superando a media habitual, que roda o vinte por cento. Na súa opinión, só así se explica esa "pequena" subida no volume de remesas enviadas a finais do ano pasado, un período no que a renda global dos estranxeiros "caera". "Esta é unha cantidade moi importante, porque moitos inmigrantes viven con salarios ó fío do salario mínimo e retraer de aí un vinte por cento para as remesas, explica fenómenos como o dos pisos patera e unha vida ao límite da subsistencia, pero o fan porque o receptor, os seus pais ou os seus fillos, son máis importantes para eles", que manter as súas actividades de lecer ou vivir nun piso máis confortable, apuntou o experto. En total, uns tres millóns de inmigrantes envían cada ano algo máis de 7.000 millóns de euros aos seus países de orixe, diñeiro que reciben directamente entre sete e oito millóns de persoas, ou, o que é o mesmo, a poboación dun país como Portugal. Morei destacou que con este diñeiro, "tres millóns de nenos poden ir á escola" ou "á sanidade", o que supón "unha visión de futuro que non hai que perder de vista".

Con todo, Morei dixo que a subida do 1,8% "non é para botar as campás ó voo", porque "boa parte dos inmigrantes están remitindo o seu subsidio de desemprego, os seus aforros ou quizais o diñeiro dalgunha propiedade que venderon", é dicir, "son ingresos que non son sostibles e teñen un límite no tempo".

Páganlle até o 20% aos intermediarios

Para o responsábel de Remesas.org, o maior problema que afrontan quen envían diñeiro á súa familia é ter que pagar á empresa intermediaria até "o vinte por cento" da remesa que queren enviar, un diñeiro ao que xa se descontaron os impostos en España e que sufrirá un novo recorte no país de destino.

EUROPA

A maioría descoñece os seus dereitos

Descoñecer os propios dereitos é un dos principais obstáculos para que se cumpran e un problema que afecta a boa parte dos colectivos máis suscepíbeis de sufrir discriminación e abusos, segundo a conclusión de varios estudos da Axencia de Dereitos Fundamentais (FRA) da Unión Europea (UE). Así, sete de cada dez inmigrantes ou membros de minorías descoñecen a existencia de leis que
prohiben impedir o acceso a un comercio ou restaurante por motivos étnicos, segundo unha enquisa entre 23.500 persoas dos 27 países da UE.

Esa sondaxe reflicte que só o 39 por cento dos preguntados sabe que existen leis que prohiben a discriminación á hora de solicitar emprego e unicamente o 31 por cento é consciente de que non está permitida a discriminación no acceso á vivenda. No caso concreto do Estado español o 89 por cento dos inmigrantes romaneses, o 84 dos suramericanos e o 75 dos norteafricanos ignoran a existencia desas lexislacións antidiscriminación. Igualmente, en toda a UE, o 82 por cento dos que afirman ser obxecto de abusos non o denunciou ante ningún organismo.