Morriña da URSS

Vinte anos logo da desaparición do réxime comunista, os rusos non valoran tanto as liberdades individuais como as conquistas sociais que garantía a Unión Soviética

IGNACIO ORTEGA/EFE . MOSCOVA

Manifestación conmemorando o aniversario da Revolución Soviética

Os rusos aínda estrañan a poderosa Unión Soviética ó cumprirse este ano dúas décadas da desaparición do estado totalitario.

"Os cambios na vida económica deben ser realizados por homes libres, xente libre nos seus actos e nas súas ideas", asegurou recentemente o presidente de Rusia, Dmitri Medvédev, que tiña 26 anos cando caeu a URSS en 1991.

O caso é que os habitantes da Federación Rusa aínda non valoran tanto as liberdades individuais, como as conquistas sociais que garantía a Unión Soviética: os empregos fixos, a educación e sanidade gratuítas, vivenda accesible e pensións. Segundo unha enquisa do prestixioso centro sociolóxico Levada, un 55 por cento dos rusos segue lamentando a desintegración soviética, que o primeiro ministro, Vladímir Putin, cualificou como "a maior catástrofe xeopolítica do século XX".

Esa porcentaxe é un reflexo da opinión dos adultos rusos, xa que entre os mozos (17 por cento) e os maiores de 60 anos (83 por cento) as posturas son moi extremas.

"O que non lamente a desintegración da URSS non ten corazón, pero o que queira o seu renacemento non ten cabeza", dixo Putin a mediados de decembro. Esa frase é un espello do ánimo de moitos rusos, ós que lles gustaría vivir nun Estado que era respectado e temido no mundo, pero que son conscientes de que o experimento soviético é irrecuperable e xa pasou ós anais da historia.

Ó botar unha mirada atrás, un 53 por cento dos rusos cre que a desintegración da URSS era evitable, mentres un 32 por cento pensa o contrario. Isto demostra por que moitos rusos seguen culpando a último dirixente soviético, Mijaíl Gorbachov, de pórlle a puntilla á URSS ó acceder a todas as demandas de Estados Unidos, que se converteu así no gañador da Guerra Fría.

EEUU é a única superpotencia mundial seguido de China

Desde entón, EEUU é a única superpotencia mundial, só seguido de cerca por China, mentres Rusia aínda non superou o trauma da fin do comunismo.

Outro exemplo desa nostalxia do antigo réxime é que máis da metade dos entrevistados avoga polo reforzamento dos lazos entre as quince antigas repúblicas ex soviéticas, pola reinstauración da URSS ou por recrear esta a imaxe e semellanza da Unión Europea.

Os rusos aínda cren firmemente nos lazos entre os antigos pobos soviéticos, especialmente con outros países eslavos como Ucraína e Bielorrusia, e tamén con Kazakhstán, que acolle unha importante minoría rusa. Ademais, do mesmo xeito que o Kremlin, seguen considerando o "estranxeiro próximo" como unha zona de especial influencia, onde a presenza occidental non é benvida de ningún modo.

Moitos identifícanse máis coa mentalidade de Putin

Moitos rusos aínda se identifican máis coa mentalidade conservadora de Putin e o seu apego á man dura que co ideario liberal de Medvédev, que opina que a "emancipación" do pobo ruso aínda é unha materia pendente.

"Nunca houbo democracia no noso país antes de 1991. Repito, nunca. Nin baixo o tsar, nin durante a era soviética, nin en ningunha outra época. É un proceso difícil", afirmou Medvédev no vixésimo aniversario do diario gobernamental Rossíyskaya Gazeta.

Medvédev, quen preside o país baixo a alongada sombra de Putin, recoñece que "a democracia é imposible nun país pobre", pero matiza que "o progreso dunha economía moderna é imposible en condicións de ditadura".

Mentres, Putin, que nos últimos anos criticou as represións estalinistas, é acusado de pór en marcha unha campaña de neosovietización da sociedade rusa que inclúe a rehabilitación dos símbolos soviéticos.

O propio Gorbachov acusou á formación oficialista Rusia Unida, encabezada por Putin, de converterse no novo Partido Comunista da Unión Soviética (PCUS) ó acoller no seu seo exclusivamente a burócratas interesados en beneficiarse da súa proximidade ó poder.

Gorbachov, que cumprirá 80 anos en marzo, anunciou a fin da Unión de Repúblicas Socialistas Soviéticas nunha alocución televisada o 25 de decembro de 1991.

Os turistas que visitaban esa noite a Praza Vermella foron testemuñas de excepción de como se arriaba a bandeira soviética e se izaba a tricolor bandeira tsarista da nova Rusia, comandada polo entón presidente, Borís Yeltsin.

Aínda que, en honra á verdade, a URSS xa deixara de existir meses antes, cando todas as repúblicas, incluída a propia Rusia, proclamaron a súa independencia e liberación do vello xugo soviético.

É NOTICIA

Deteñen vinte opositores

Unha vintena de opositores rusos foron detidos onte cando se dispuñan a protestar fronte á prisión preventiva de Moscova onde se atopan encerrados varios dos seus líderes desde o 31 de decembro pasado. "Detivéronnos preto da prisión preventiva na avenida de Simferópol", asegurou Alexandr Ribkin, un dos dirixentes do movemento opositor "Solidarnost" (Solidariedade), á axencia Interfax.

Atacan unha igrexa no Cáucaso

Varios atacantes sen identificar incendiaron o domingo unha igrexa cunha granada no Cáucaso Norte, unha zona de maioría musulmá, o que supón o último acto de violencia nunha rexión na que o Goberno ruso intenta conter a insurxencia islamita. Ninguén resultou ferido no ataque á igrexa cristiá ortodoxa de Ordzhonikidze, na rexión de Ingushetia que limita con Chechenia.